Гэта ўжо 20-е пасяджэньне форуму, які зьяўляецца адной з ключавых плятформаў для дыялёгу паміж палітычнымі лідэрамі, экспэртамі і прадстаўнікамі грамадзянскай супольнасьці.
Тэма гэтага году: «Парушанае партнэрства: як выжыць трансатлянтычнаму супрацоўніцтву?» Удзельнікі абмяркоўвалі шляхі аднаўленьня даверу і ўмацаваньня партнэрства паміж ЗША і Эўропай ва ўмовах глябальнай нестабільнасьці.
Сярод выступоўцаў прысутнічалі вярхоўная прадстаўніца ЭЗ у пытаньнях зьнешняй палітыкі і бясьпекі Кая Калас, намесьнік міністра разьвіцьця і тэхналёгій Польшчы Міхал Бараноўскі, былы галоўнакамандуючы Аб’яднанымі ўзброенымі сіламі NATO ў Эўропе Кёрціс Скапароці.
Ціханоўская выступіла з прамовай, у якой падкрэсьліла важную ролю Беларусі ў бясьпецы Эўропы будучыні і заклікала да актыўнай падтрымкі беларускіх дэмакратычных сілаў:
«Я казала, што бясьпека, дэмакратыя і дабрабыт узаемазьвязаныя і ня могуць існаваць адно без аднаго. Казала пра незалежнасьць Беларусі: яна цяпер пад пагрозай — і нам крытычна выцягнуць Беларусь з лапаў Расеі. Пра неабходнасьць чалавечых кантактаў, выдачы візаў і дапамогі беларусам. Цяпер вырашаецца лёс Эўропы, а Беларусь узятая ў закладнікі. І нам патрэбная дапамога Эўропы і свабоднага сьвету, каб гэта зрабіць», — распавяла Сьвятлана Ціханоўская.
11 чэрвеня ў сталіцы Бэльгіі Брусэлі праходзіла пасяджэньне Кансультацыйнай групы Эўразьвязу і беларускіх дэмакратычных сілаў — пляцоўкі, якая аб’ядноўвае прадстаўнікоў эўрапейскіх інстытутаў і беларускай палітычнай і грамадзянскай супольнасьці. Гэта ўжо 5-я сустрэча Кансультацыйнай групы ў Брусэлі.
Офіс Сьвятланы Ціханоўскай паведаміў, што сёлета сустрэчы сканцэнтраваныя на:
- палітычнай сытуацыі ў Беларусі і рэгіянальнай бясьпецы;
- візавай мабільнасьці беларусаў у ЭЗ;
- стане незалежных мэдыя і супрацьдзеяньні прапагандзе;
- падтрымцы дэмакратычных сілаў і грамадзянскай супольнасьці.
Хто такая Сьвятлана Ціханоўская
Сьвятлана Ціханоўская — беларускі палітык, былая кандыдатка ў прэзыдэнты Беларусі. Цяпер знаходзіцца ў Літве.
- Сьвятлана Ціханоўская нарадзілася ў 1982 годзе ў Мікашэвічах (Берасьцейская вобласьць).
- 15 траўня 2020 году пасьля адмовы Цэнтральнай выбарчай камісіі зарэгістраваць мужа Сьвятланы, зьняволенага лідэра кампаніі «Страна для жизни» блогера Сяргея Ціханоўскага, Сьвятлана ад свайго імя падала дакумэнты на рэгістрацыю ініцыятыўнай групы. 20 траўня яе групу зарэгістравалі. 29 траўня кіраўніка яе выбарчага штабу Сяргея арыштавалі зноў.
- Кандыдаткай у прэзыдэнты Ціханоўскую зарэгістравалі 14 ліпеня 2020.
- Пасьля арышту прэтэндэнта на пасаду прэзыдэнта Віктара Бабарыкі і ўцёкаў за мяжу яшчэ аднаго прэтэндэнта Валера Цапкалы іх штабы аб’ядналіся з штабам Сьвятланы Ціханоўскай. Аб’яднаны штаб правёў пасьпяховую выбарчую кампанію з шматтысячнымі мітынгамі ў вялікіх і малых гарадах Беларусі пад бел-чырвона-белымі сьцягамі.
- Паводле афіцыйных зьвестак ЦВК, на выбарах Сьвятлана Ціханоўская набрала 10,09%, а Аляксандар Лукашэнка — 80,08%. Ціханоўская адмовілася прызнаць гэтыя вынікі і 10 жніўня асабіста накіравалася ў ЦВК, каб іх абскардзіць.
- З ЦВК палітык не вярнулася. Сувязь зь ёю зьнікла, празь некалькі гадзін у вэстыбюлі ЦВК яна паведаміла, што «прыняла рашэньне» і зьехала ў невядомым кірунку. 11 жніўня стала вядома, што яна ў Літве. Былі апублікаваныя два відэазвароты Ціханоўскай, адзін зь якіх быў запісаны ў ЦВК пасьля размовы з двума высокапастаўленымі сілавікамі, у ім Ціханоўская заклікае дэманстрантаў не выходзіць на вуліцы. Кіраўніцтва Літвы 11 жніўня заявіла, што звароты Ціханоўская запісала пад ціскам і шантажом.
- Празь некалькі дзён пасьля фактычнай «дэпартацыі» ў Літву Сьвятлана Ціханоўская заявіла, што бярэ на сябе ролю «нацыянальнага лідэра».
- 18 жніўня з ініцыятывы Сьвятланы Ціханоўскай у Беларусі была створаная Каардынацыйная рада для транзыту ўлады.
- 10 верасьня 2020 Сэйм Літвы прагаласаваў за прызнаньне Сьвятланы Ціханоўскай абраным кіраўніком Беларусі.
- Ад верасьня 2020 году Ціханоўская наведала з працоўнымі візытамі дзясяткі краін сьвету і сустрэлася зь іх лідэрамі. Сярод іх прэзыдэнт Францыі Эманюэль Макрон, канцлер Нямеччыны Ангела Мэркель, высокі прадстаўнік ЭЗ Жузэп Бурэль, прэзыдэнт ЗША Джо Байдэн ды інш.
- Сьвятлана Ціханоўская кантактавала з актыўнымі людзьмі ў Беларусі падчас пратэстаў 2020 і 2021 гадоў, прызначыла сваіх прадстаўнікоў для падтрыманьня лучнасьці з сацыяльнымі і прафэсійнымі групамі ў краіне.
- Ціханоўская выступіла за правядзеньне ў Беларусі новых празрыстых прэзыдэнцкіх выбараў пры міжнародным кантролі і актыўна заклікала міжнародную супольнасьць да ўдзелу ў арганізацыі перамоваў зь цяперашнім кіраўніцтвам Беларусі.
- За два гады Ціханоўская, яе штаб і зьвязаныя з ёй ініцыятывы дапамагалі палітвязьням, выступалі з шэрагам гуманітарных і палітычных ініцыятываў.
- Яна выступала супраць сфальшаванага канстытуцыйнага рэфэрэндуму, ініцыяванага Лукашэнкам у 2022 годзе.
- У лютым 2022 Ціханоўская асудзіла расейскую агрэсію супраць Украіны і саўдзел у ёй рэжыму А. Лукашэнкі, у сакавіку 2022 году стварыла беларускі Антываенны рух.
- У красавіку 2022 году Ціханоўская на канфэрэнцыі Рады Бясьпекі ААН заявіла, што «поўдзень Беларусі фактычна знаходзіцца пад расейскай акупацыяй».
- Ціханоўская правяла пасьпяховыя перамовы з урадам Польшчы і дамаглася асаблівых умоваў для прыезду і легалізацыі беларусаў, ня згодных з рэжымам Лукашэнкі.
- У жніўні 2022 году Сьвятлана Ціханоўская стварыла Аб’яднаны пераходны кабінэт, назвала чатырох сваіх прадстаўнікоў.
- У лістападзе 2022 Ціханоўская ўпершыню назвала сябе прэзыдэнтам-электам
Форум